Симева: Мојот сон е настап на грен слемови, освојувам ВТА турнири!
На државното сениорско првенство Симева во женска конкуренција беше поуспешна од Јана Стојанова со резултат 2:0 по сетови 6:1 и 6:4. Исто така на терените на ТК Југ во машка конкуренција Горазд Србљак беше најдобар кој пак со 2:1 (3:6, 6:3, 6:2) славеше против Димитар Грабул.
– Да, тоа е успех за мене бидејќи сум најмлада шампионка на државно првенство за жени во Македонија до сега и тоа е голем мотив за мене за понатамошните турнири – ни изјави Симева.
Симева („Тенис Парк“ Скопје) која воедно е и државен првак до 14 и 18 години, учествува и на меѓународните турнири, своевремено финалистка во Романија и Германија, лани беше блиску да ја освои Барселона, со титула во сингл и дубл во Турција. Тука може да се додаде и една од нејзините најдраги титули на „Dubrovnik Dud Bowl“ (У13). Прво место во сингл и дубл на ИТФ Тенис Европа (ITF/Tennis Europe Development).
– Моите наредни турнири се 2 ITF U18 во Скопје и имам во план уште неколку ITF турнири надвор од Македонија до крај на годината – вели македонската тениска шампионка.
Таа воедно ги следи и настапите на најдобрите во овој спорт, нејзиниот идол е швајцаркиот тенисер Роџер Федерер, човек со многу грен слем турнири, кој носи огромно искуство, едно од најголемите тениски имиња кое и покран неговите 37 години доминира на терените.
– Мојата најголема желба и сон е да учествувам и освојувам ВТА турнири и грен слемови – додаде Симева.