Диего Симеоне, тренерот на фудбалерите на Атлетико Мадрид, беше видливо разочаран по натпреварот со Арсенал на стадионот „Емирати“ во реваншот од полуфиналето во Лигата на шампионите. Сепак, не ја пропушти можноста да ги пофали своите играчи и покрај поразот.

Зборувајќи за своите впечатоци од возвратниот меч во Лондон, Симеоне нагласи дека неговиот ривал заслужил да се пласира понатаму.

– Ако сме елиминирани, тоа значи дека противникот го заслужил тоа, пред сè поради ефикасноста во првото полувреме. Чувствувам мир и задоволство затоа што тимот го даде својот максимум. Можевме да го добиеме првиот натпревар, но не бевме доволно конкретни. Во првото полувреме од играта, бевме подобри во одбраната, но понудивме малку во нападот. Се подобривме во второто полувреме, но некои ситуации не беа во наша корист. Сепак, стигнавме подалеку отколку што очекуваше секој и се справивме со исклучително силен ривал на рамноправна основа. Благодарен сум на навивачите и на играчите и горд сум на сè што направивме – рече Симеоне.

Кога беше прашан за контроверзната ситуација и можниот пенал над Гризман, тој беше јасен:

– Не сакам да се задржувам на таа ситуација. Можеме да зборуваме и за прекршокот врз Пубиља за кој мислевме дека постои, но не барам изговори.

Коментирајќи го задржувањето на времето, тој нагласи дека тоа е составен дел од играта:

– Тоа е фудбалот, сите знаеме дека во тие моменти секој сака времето да помине побрзо. Микел Артета одлично ја врши работата, а клубот има финансиска сила да го поддржи. Среќен сум за нив, тие работат на ова со години и нивните напори се исплатија.

Симеоне се осврна и на моменталната состојба на клубот:

– Ова е реалноста на Атлетико Мадрид, клубот многу напредуваше и сега е признат низ цела Европа и светот. Сепак, навивачите сакаат трофеи, не е доволно само да се дојде до завршницата – се зборовите на Симеоне.