Шест деца се во критична состојба по пукањето во Казан
Детската републичка клиничка болница во Татарстан прими 18 деца по пукањето во училиште во Казан, а шест од нив се во критична здравствена состојба, соопшти прес-службата на регионалното Министерство за здравство, пренесува TACC.
Путин нареди промена на законот за оружје по пукањето во Казан
„Вкупно се примени 18 деца. Шест од нив се во исклучително сериозна состојба – операциите се во тек. Останатите имаат рани, скршеници и модринки и во моментов се на испитување и лекување”, се вели во соопштението.
Инаку, напаѓачот, идентификуван како Илназ Гаиалијев, има 19 години и е поранешен ученик во тоа училиште. Според порталот База, тој на апликацијата Телеграм пред нападот креирал канал и оставил неколку пораки. Се фотографирал со маска на која пишува „Бог” и напишал дека ќе го нападне училиштето а потоа ќе се застрела себеси.
Министерството за внатрешни работи на Татарстан соопшти дека напаѓачот бил сам и немал соучесници. Напаѓачот имал експлозивна направа и автоматско оружје.
Сепак, локалните медиуми наведуваат дека полицијата проверува и друга верзија – дека напаѓачот имал двајца соучесници, односно помагачи. Според извор од ФСБ наводно приведен е и 41-годишниот Мохамедшим Рамил, осомничен за помагање и поддршка на нападот
Генералниот директорат на Министерството за вонредни ситуации (ЕМЕРКОМ) на Русија во Татарстан отвори телефонска линија за психолошка помош.