Општина Аеродром објави оглас за давање под закуп на покриениот шанк лоциран во паркот „Авионче“ во Ново Лисиче, на кој можат да се пријават заинтересираните угостители, а кој од нив ќе стопанисува со шанкот ќе се избере по пат на електронско јавно наддавање, што ќе се спроведе преку електронскиот систем www.e-stvari.mk.

Рокот за поднесување пријави е до 13 февруари , а јавно наддавање ќе се одржи три дена подоцна, односно на 16 февруари.

Шанкот што се нуди под закуп на пет години е со површина од 118,76 квадратни метри, а објектот располага со кафе-бар, кујна, тоалети, тераса и помошни простории.

Како дел од посебните услови, најповолниот понудувач ќе има обврска во рок од 90 дена да постави детско игралиште со реквизити во паркот, да обезбеди редовно одржување на просторот, јавен пристап до тоалетите, систем за управување со отпад и 24-часовна чуварска служба.  Општина Аеродром со оваа постапка продолжува со транспарентно управување со јавниот простор, унапредување на парковската инфраструктура и создавање подобри услови за граѓаните, како и поддршка на локалниот бизнис сектор, информират од Аеродром.

Целосната документација и условите за учество се достапни  на официјалната веб-страница на Општина Аеродром.