Заканата на генералот Хосеин Салами доаѓа по само еден ден откако претседателот на САД, Доналд Трамп, соопшти дека и дозволил на американската морнарица да ги уништи сите ирански бродови доколку дојде до судир.

– Им наредив на нашите поморски сили да ги уништат сите американски терористички сили во Персискиот залив кои ја загрозуваат безбедноста на иранските воено и цивилни бродови, изјави Салами на иранската државна телевизија, пренесува „Ројтерс“.

Иран вчера соопшти дека успешно лансирал воен сателит во орбитата што ја прави оваа земја „светска сила во најава“.

Исламската Револуционерна гарда го поздрави лансирањето и посочи дека тоа претставува пресвртница за земјата наспроти американските обвинувања дека вселенскиот програм има за цел прикривање на развивањето на балистички ракети.

– Денес земјата ја гледаме од небо, а тоа значи почеток на формирање нова светска сила, истакнал Салами.

Иран претходно ги отфрли сите обвинувања дека има за цел да обезбеди нуклеарно оружје и тврди дека неговата вселенска програма е во согласност со резолуцијата на Советот за безбедност на ОН.