Сега починатата Ивана Јовановска телефонски го пријавила сопругот Стојанче Јовановски на 15 октомври 2025 година, дека чува дрога во нејзиниот стан на булевар „Теодосиј Гологанов“ се слуша на аудиоснимка од центарот за итни случаи 112, која денеска беше презентирана во судница.

Ивана се јавила на 112 и го пријавила Стојанче Јовановски дека чува дрога, дека е заклучен во тој момент во станот и не ја пушта да влезе.

Од операторот таа бара да ја поврзат со полиција и му се обраќа: „Сакам да пријавам дека во мојот стан сопругот чува дрога“. Операторот, како што може да се слушне од снимката, бара податок за име на сопругот, а Ивана без да го каже – бара да ја поврзат со полиција. Потоа Ивана се обраќа до Стојанче – „Ќе отвориш или да те пријавам?“. Потоа вели „А, сигурен си?“. Потоа повикот завршува.

Овој повик е поврзан со претходен повик од истиот ден кога Ивана во 8 часот и 38 минути од својот телефонски број се јавила на 112. Во тој повик, како што се слуша од снимката, Ивана го прашува операторот каде да се обрати кога некој ѝ го има заклучено станот и не ја пушта да влезе во него.

Операторот на 112 ѝ кажува да се јави на куќен совет, а ако не успее, тогаш операторот ќе ја поврзе со Пожарна. Ивана во повикот објаснува дека куќниот совет нема клучеви од нејзиниот стан. Бара да ја поврзат со полиција, операторот пак ѝ вели да се консултира со куќниот совет па ќе ја поврзат со Пожарна за да ја скршат вратата. Ивана вели дека не ѝ е проблем да биде скршена вратата.

Како Ивана барала помош на бројот 112 кога Стојанче ѝ го заклучил станот, се слуша од аудио-снимки во судница