Украина објави итна и целосна евакуација на 12.000 жители од две гратчиња и 35 села околу Купјанск во североисточниот дел на земјата поради обновени и засилени руски артилериски напади во регионот на Харков. При гранатирањето вчера била убиена една жена, а девет лица биле ранети.

Министерството за одбрана во Москва објави дека „руските ударни сили при офанзивна операција ги подобриле своите позиции во насока кон Купјанск“, а Киев соопшти дека нападите биле одбиени. И во март поради засилено руско гранатирање Украина прогласи итна евакуација на жителите од околината на Купјанск, град со своевремено 26.000 жители и регионален сообраќаен, железнички и логистички јазол. Во првите денови од инвазијата руските сили го окупираа Купјанск, но Украинците го ослободија во контраофанзивата во септември.

– Главниот фокус на украинската армија е на југот, а Русите се фокусирани на истокот. Русите се уфрлаат во два главни региона, Купјанск и Лиман. Таму е кошмар – изјави украинската министерка за одбрана Хана Малијар.

Таа додаде дека на фронтот кај Бахмут украинските сили навлегле до предградијата.

– Напредуваме по двете крила во Бахмут. Ги зазедовме сите главни возвишенија. Русите таму се заглавени. За да се извлечат од Бахмут – изјави министерката.