Премиер лигата е суспендирана од средината на март поради пандемијата на коронавирусот, а иако се прават планови за доигрување на сезоната, сè уште ништо не е официјално.

Премиер лигата во понеделникот објави дека во првиот бран кога е дозволено играчите да започнат со групни тренинзи, се извршени 748 тестови и шест фудбалери и членови на екипите се позитивни на коронавирус.

Еден од фудбалерите кои се противи на продолжувањето на сезоната е англискиот репрезентативец Дени Роуз кој моментно настапува за Њукасл.
– Луѓето зборуваат дека треба да се вратиме на фудбалот, како да сме лабораториски глувци или заморчиња. Ќе експериментираат со нас и ќе видат дали тоа функционира или не. Тпчно можам да ги замислам луѓето како седат дома и зборуваат: Заработуваат толку многу пари и треба да се вратат на терен.

Потенцијално можам да го ризикувам своето здравје за да се забавуваат луѓето, но искрено не сакам да учествувам во такво нешто – изјави Роуз.

Уште еден фудбалер кој јавно изјави дека нема шанси да се врати на тренинзите и да ја доигра сезоната се додека не биде безбедно за сите е капитенот на Вотфорд, Трој Дини.