Еурофарм Пелистер и Вардар ќе решаваат во меѓусебен дуел в недела кој ќе ја освои титулата во домашното првенство. Моментно битолчани водат на табелата од плејофот во Суперлигата со два бода и на Вардар му врши работа само победа ако сака да ја задржи титулата.

За црвено-црните ова е веројатно најважниот меч сезонава, не само на домашната сцена туку вклучително и со меѓународните натпревари. Вардар е шампион шест пати во последните седум сезони, па сака да ја задржи таа низа, а на актуелниот првак му зависи и играњето во ЛШ следната сезона. Во првиот меч помеѓу Вардар и Еурофарм Пелистер од плејофот, во Скопје, победија битолчани со 24-23. Вардар сака да се реваншира в недела во пеколната атмосфера на „Боро Чурлевски“. Според голманот Борко Ристовски, во тимот на црвено-црните не постои сомневање дека тоа можат да го сторат.

– Ова е сигурно најважниот меч на Вардар сезонава, но би додал дека ова е можеби еден од најважните мечеви во последниве години. Не се работи за престиж во ЛШ, туку за освојување на македонското првенство. Направивме еден кикс, се донесовме во оваа ситуација и сега треба сами да се извадиме – вели Ристовски, според кого во тимот постои самодоверба пред дербито.

– Кај нас не постои несигурност и сомнежи во пресрет на дербито. Мислам дека ние сепак сме поквалитетна екипа. Но тоа мора да се покаже на теренот. Во првиот меч притисокот беше на нас, сега и тие ќе имаат одреден притисок. Како и да е, мораме да го добиеме овој натпревар. Ќе одиме со сите сили да победиме и да ја освоиме шампионската титула – вели искусниот голман. Обете екипи се под притисок во ова дерби. Според Ристовски, притисокот е малку поголем кај домаќинот.

– Мислам дека поголем дел од притисокот ќе падне на нивниот грб. Секако притисок ќе имаме и ние затоа што сепак се работи за Вардар и за натпревар во којшто се решава титулата. Да кажеме дека притисокот е 55-45 процентуално, а претежнува на нивна страна. Ќе биде тоа тежок натпревар, можеби неубав за око, но јак, цврст. Се надевам дека на крајот ние ќе се радуваме – вели Борко, кој вели дека атмосферата во салата „Боро Чурлевски“ само ќе го мотивира да даде повеќе.

– Мене лично тој вид притисок ме мотивира. Сакам да играм пред полна сала на натпревари кои нешто значат. Ова ќе биде токму таков меч и ќе бидам дпоолнително мотивиран да и помогнам на екипата да победи – смета голманот, кој е задоволен од својата моментна форма.

– Последниот период беше пауза поради настапите на репрезентацијата и немав доволно натпревари. Но во последниве два меча влегов во форма и мислам дека ќе бидам подготвен да го дадам најдоброто за дербито – смета Ристовски. Тој открива што ќе биде најважно за Вардар ако сака да победи во Битола.

– За нас ќе биде тежок меч во кој ќе мора сите да одиграме на високо ниво и да ги лимитираме сите нивни играчи да не го дадат својот максимум. Да ги ограничиме во нивните можности, за да ја оствариме својата цел – вели Ристовски во прeсрет на неделното дерби во Битола.

Во претходното коло, Вардар победи на гостувањето кај Охрид 28-21, а Еурофарм Пелистер како гостин го совлада Тиквеш со 32-26.