Раководството на Формула 1 го објави натпреварувачкиот календар за 2023 година, во која има рекордни 24 трки. Календарот за натпреварување беше одобрен од Меѓународната автомобилска федерација (ФИА) и Советот на светскиот мото спорт.

Сезоната официјално ќе започне на 5 март во Бахреин, две недели подоцна трката ќе се одржи во Саудиска Арабија, а на 2 април во Австралија. Трката во Кина е закажана за 16 април, во Азербејџан на 30 април, а во Мајами на 7 мај.

Две недели подоцна трката за Големата награда на Емилија Ромања ќе се вози во Италија, на 28 мај во Монако, на 4 јуни во Шпанија, а 14 дена подоцна ќе се вози трката во Канада.

Четири трки ќе се одржат во јули, на 2 јули во Австрија, 9 јули во Велика Британија, 23 јули во Унгарија и 30 јули во Белгија.

Introducing the 2023 F1 Calendar 👀

Get set for a record-breaking 24 races next season!#F1 pic.twitter.com/t6Jl521H1G

— Formula 1 (@F1) September 20, 2022

Потоа следува летна пауза, а првенството ќе продолжи на 27 август во Холандија. Следува трка во Италија на 3 септември, потоа во Сингапур на 17 септември и во Јапонија седум дена подоцна.

Трката во Катар е закажана за 8 октомври, во САД на 22 октомври, а во Мексико на 29 октомври.

Најдобрите светски Ф1 возачи ќе се натпреваруваат во Бразил на 5 ноември, во Лас Вегас на 18 ноември и тоа во сабота, за прв пат од 1985 година, а сезоната ќе заврши на 26 ноември во Абу Даби.

– Присуството на 24 трки во календарот на Светското првенство во Формула 1 во 2023 година е дополнителен доказ за растот и привлечноста на спортот на глобално ниво. Додавањето нови трки и задржувањето на традиционалните места покажува дека ФИА добро управува со спортот – рече претседателот на ФИА, Мохамед бин Сулајем.