Бројот на намерни убиства ширум светот се искачил на рекордно високо ниво во 2021 година, делумно поради стресот и притисокот врз економијата поради Ковид-19.  Според глобалното истражување за убиства на Канцеларијата на Обединетите нации за дрога и криминал околу 458 илјади луѓе биле убиени намерно во 2021 година, а од 400 илјади до најмногу 450 илјади биле регистрирани секоја година откако истражувачите почнале да собираат податоци во 2000 година.

Значајниот скок на убиствата во 2021 година може делумно да се должи на економските ефекти од ограничувањата поврзани со Ковид…На подолг рок, негативните социјални и економски последици од домашно затворање, кои можат да вклучуваат зголемен стрес и анксиозност, невработеност или губење на приход, може да се очекува да влијаат на трендовите на убиства преку создавање на средина на „тензија“ што ги тера луѓето да сторат кривични дела, се вели во извештајот.

Севкупно, земјите во Америка продолжуваат да имаат највисоки стапки на убиства меѓу петте глобални региони – повеќе од шест пати поголема од стапката на убиства во  Европа, која е најниска.

Во 2021 година, осум од десетте земји со највисока стапка на убиства биле во Латинска Америка и на Карибите, се вели во извештајот, наведувајќи фактори како што се криминалните групи кои се борат за контрола на пазарите, слабото владеење на правото и социјалната нееднаквост.

Хондурас, Јамајка, Тринидад и Тобаго и Мексико се меѓу оние со највисока стапка на убиства. Двете земји во топ 10 надвор од Латинска Америка и Карибите се Мјанмар и Јужна Африка.

Истражувањето за убиства на Канцеларијата на Обединетите нации за дрога и криминал (UNODC), кое се објавува на секои четири до пет години, го анализира развојот на настаните до 2021 година, бидејќи ова е последна година со целосен сет на податоци.