Младиот ракометар Бобан Поповски вчера одигра историски натпревар во домашниот ракомет. Крилото на Мулти Есенс блесна со неверојатни 37 погодоци во натпреварот против Вардар Неготино во рамките на младинската лига, поставувајќи рекорд кој тешко ќе биде надминат.

Скопскиот состав доминираше и славеше со неверојатни 86–14, резултат што исто така се смета за историски во официјални натпревари во македонскиот ракомет.

Поповски, кој настапува на крилната позиција, беше незадржлив во текот на целиот натпревар. Неговата голгетерска вечер добива уште поголема тежина ако се знае дека бројката од 37 поени е реткост дури и во кошаркарските натпревари, а камоли во ракомет.

Дека ќе следи ретко виден резултат Мулти Есенс најави по првото полувреме кое домаќините го добија со убедливи 42–8. Во вториот дел разликата само продолжи да расте до конечните 86-14.