Вториот финалист на Фајнал-фор турнирот во Евролигата во Белград е Реал Мадрид, кој во шпанската битка ја совлада Барселона со 86:83.

Ова беше четврти меѓусебен дуел на двата најголеми шпански клуба на завршните турнири. Сите три дуели се играа во финалето и интересно е што во сите три наврати победникот од тој дуел секој пат беше поразен во финалето.

Последен пат Реал играше во евролигашко финале во сезоната 2017/2018 кога триумфираше над Фенербахче. Ова ќе биде 19 финале за „кралевите“ во најсилното европско клупско натпреварување.

Уште еден натпревар со многу пресврти. Реал тргна подобро, поведе со 8:2 благодарение на расположениот Јабуселe. Но, Барса успеа да се врати и до крајот на четвртината замина со израмнет резултат – 19:19.

Во втората четвртина каталонскиот гигант беше многу подобар, особено во фазата на одбрана, а Миротиќ и Лапровитола беа нерешлива енигма за Реал. Епилогот од ваквиот однос на силите беше голем пресврт и заминување на голем одмор со предност за Барса од 11 поени разлика – 45:34.

По половина од третиот период се чинеше дека Барса рутински одржува голема разлика. Но, следеше серија на Реал од 17:2 и Реал ја дочека последната четвртина со четири поени предност.

ВИДЕО: Драма во Белград, Мициќ со тројка во последната секунда го урна Олимпијакос

Реал одлично притискаше, имаше и седум поени предност (66:59). На крајот тандемот Лапровитола-Миротиќ повторно носи драма и изедначени 75:75. По тајм-аутот одлична улога одигра Козер, пет врзани поени за 80:75 на две минути пред крајот. Барса потоа успеа да врзе четири поени, но Реал го имаше тој поен повеќе и следеше „пенал завршница“. Реал беше прецизен, додека Јабуселе имаше офанзивен скок на 2,7 секунди до крајот и му обезбеди на Реал „плус три“. Миротиќ се обиде од половина терен да израмни, но безуспешно.

Кај стрелците за Реал доминираше Козер со 18 поени, а на спротивната страна Миротиќ постигна 25 поени, 12 скока и пет асистенции.