Во едно неверојатно полуфинале со доста возбудувања, на Фајнал-фор турнирот во Евролигата кој се одржува во Белград (Србија), екипата на Анадолу Ефес Истанбул со 77:74 го совлада Олимпијакос.

Турците обезбедија пласман во големото финале после тројката на српскиот интернационалец Василије Мициќ во последната секунда од мечот.

Во победничките редови Ларкин забележа 21 поен (седум асистенции), а на спротивната страна во редовите на грчкиот состав МекКисик постигна 12.

Потсетување дека Анадолу Ефес ја брани титулата од минатата сезона, а во 2019 година беше второпласиран зад ЦСКА Москва.

Противник на турскиот претставник во финалната битка за трофејот (21 мај, сабота) ќе биде победникот од втората полуфинална средба меѓу Реал Мадрид и Барселона (вечерва, 21.00 часот) во „Штарк Арена“.