Баерн Минхен доживеа тежок пораз на гостувањето кај Реал Мадрид, откако „кралевите“ славеа со убедливи 93-70 во натпревар во кој практично немаше неизвесност.

Тимот од Минхен, за кој настапува македонскиот репрезентативец Ненад Димитријевиќ, уште од стартот се соочи со расположен домаќин. Реал брзо наметна силно темпо и веќе кон крајот на првата четвртина создаде двоцифрена предност (17-6). Иако Баерн успеа да намали на 19-12 по првите десет минути, тоа беше само краток здив.

Во втората четвртина мадридскиот состав целосно ја презеде контролата, ја зголемуваше разликата од напад во напад и на паузата замина со високи плус 20 (53-33). Разликата продолжи да расте и по одморот, а во еден момент достигна и максимални 32 поени (85-53). Гостите во завршницата само делумно го ублажија поразот, но немаа сила за посериозен отпор.

Димитријевиќ беше меѓу поистакнатите кај Баерн со 11 поени, на кои додаде три скока и четири асистенции. Најефикасен во редовите на германскиот тим беше Џордан Џесуп со 17 поени, додека кај победникот се истакна Марио Хезоња со 16 поени.