Рускиот претседател Владимир Путин му рекол на својот турски колега Реџеп Таип Ердоган во телефонски разговор дека Русија ќе ги прекине своите воени операции само ако Украина престане со борбите и ако барањата на Москва бидат усвоени, соопшти Кремљ.

Русија инсистира дека нејзината инвазија на Украина од копно, воздух и море е специјална воена операција, за која Путин тврди, без никакви докази, дека е неопходна за „денацификација“ на земјата, пишува Би-Би-Си.

Рускиот лидер повтори дека рускиот напад се одвива според планот и распоредот.

Слични изјави имаше и претходните денови и покрај проценките на западните аналитичари дека руската воена кампања напредува полошо од очекуваното.

Според соопштението на Кремљ, Путин рекол дека се надева оти украинските преговарачи ќе заземат поконструктивен став.

Кабинетот на Ердоган соопшти дека турскиот лидер повикал на итен прекин на огнот.

Членот на украинската делегација Дејвид Арахами вчера најави дека во понеделник ќе се одржи третата рунда преговори меѓу Украина и Русија.

Претходните две рунди не ставија крај на конфликтот, но страните се договорија да воспостават „хуманитарни коридори“ за евакуација на цивилите.