Публикација: Излезе зборникот „Традиција и транзиција“ во издание на Националниот комитет на ИСТМ
Неодамна од печат излезе зборникот „Традиција и транзиција“ во издание на Националниот комитет на ИСТМ (Интернационален совет за традиционална музика) за Македонија. Оваа книга е особено значајна бидејќи е целосно подготвена во Македонија, а е наменета за светската стручна јавност.
Работена е под строгите правила кои ги наметнува ИСТМ како меѓународна организација и одобрена е за печат од Центарот за публикации во Виена. Во неа се објавени селектирани трудови од двата симпозиуми на студиската група на ИСТМ „Музиката и танцот на словенскиот свет“, одржани во Љубљана (2016) и Скопје (2018).
Публикацијата содржи 21 текст на еминентни научници и истражувачи од 12 земји. Темите кои се обработени се во склад со тематската рамка на самата студиска група, но oрганизирани во поттеми кои се фокусираат на истражување на релациите општество – културна продукција, процесите на трансформација на танцовата и музичката практика, музиката и танцовата антропологија итн.
Уредувачкиот одбор, кој речиси две години работеше на подготовка на оваа публикација, е составен од истражувачи од САД, Русија, Австрија, Словенија и Македонија. Главен и одговорен уредник е професорката од Факултетот за музичка уметност, Соња Здравкова-Џепароска.
(Текстот е објавен во „Културен печат“ број 56, во печатеното издание на „Слободен печат“ на 14-15 ноември 2020)