Во објектот на Националната опера и балет, на 23 јануари, со почеток од 20 часот, својот прв концерт ќе го одржи Националниот џез оркестар. Станува збор за нова национална установа, која беше основана минатата година, а произлезе од активностите на Здружението на џез музичари и слободни уметници.

Првиот концерт на установата е со наслов „Џез нова“ (Jazz Nova). Со овој концерт, кој ќе претставува еден вид симбиоза на биг-бенд творештвото на истакнати македонски џез-автори од повеќе генерации, свечено ќе биде одбележан почетокот на концертната сезона на Оркестарот.

За месеците кои следат, новата национална установа подготвува внимателно избран репертоар кој ги следи актуелните трендови во џез-музиката, но вклучува и изведби на џез-класици од домашната, регионалната и светската џез-сцена, како и гостувања на еминентни музички имиња.