Колку пати во животот досега едвај сте чекале да поминат новогодишните и божиќните празници?Да помине целиот стрес околу организацијата и долгото подготвување за забави со пријателите и поширокото семејство?

Оваа година сме повеќе од свесни колку време сме трошеле на подготовки наместо да се одмориме, да се напиеме кафе со сопругата, сопругот, родителите или едноставно да се дружите со вашите деца во скромноста на вашиот дом.

Дочекот на новата година може да биде идеално време да се посветите на дружбата со вашите најблиски, бидете креативни, смислете начини како да се забавувате дома. 

Претворете ја вашата дневна соба во сала за танцување, пуштете музика, вклучете ги сијаличките и уживајте. Вклучете ги сите членови на вашето семејство во подготовката на вкусните јадења. Или едноставно пополнете го времето со семејството и децата играјќи забавни игри.

Најдете ја речиси заборавената игра „Не лути се човече“, играјте карти или имајте „борба“ со перници. Овие игри за момент ќе ги оттргнат вашите мисли, ќе ве опуштат и ќе уживате во квалитетно поминатото време заедно.

Искористете ги овие навидум ограничените денови за да се поврзете на подлабоко ниво со луѓето кои ги сакате, не сте свесни дека на тој начин создавате среќни спомени кои ќе ги памтите до крајот на вашиот живот.

Организирајте караоке натпревар,  пуштете ги хитовите кои ја одбележаа годината во заминување и пејте гласно, или едноставно играјте пантомима – одлична можност да ја зачинете вечерта со смеа и забава.

Дружењето заедно на овој начин е секогаш подобра алтернатива отколку целото семејство со часови да седи пред телевизија, или да поминува време гледајќи во екранот на мобилниот телефон или компјутер.

Секако, и утрото по новогодишната ноќ можете да го искористите да гледате некој празничен филм заедно или да организирате заедничка (кратка) посета кај вашите родители, баби и дедовци или  други членови на семејството.