Во заедничка акциска контрола на полицијата од Тетово и Гостивар, спроведена синоќа во неколку ноќни клубови, приведени се седум странски државјанки поради злоупотреба на туристичкиот престој и престојување спротивно на целта.

Како што информира Министерството за внатрешни работи, контролата била спроведена синоќа од 22 часот до 2 часот, во угостителски објекти во селата Желино и Зубовце. Во ноќен бар во Желино, во сопственост на 47-годишниот Ј.Ф. од истото село, биле затекнати пет државјанки на Република Албанија на возраст од 24 до 50 години.

Во друг објект – ноќен клуб во селото Зубовце, сопственост на 50-годишниот Р.Б. од село Добридол, биле затекнати уште две албански државјанки на возраст од 33 и 36 години.

Сите седум лица се приведени и задржани во полициските станици Тетово и Гостивар за понатамошна постапка. Акцијата е дел од планирани контроли за откривање нелегален престој и злоупотреби на визен режим.