Ракометарите на Прилеп продолжуваат со одличните партии и го запишаа вториот последователен триумф. По убедливата победа против Бутел, тимот вечерва приреди ново изненадување совладувајќи го Пролет на негов терен со 27-30.

Гостите влегоа цврсто во мечот иако Пролет на почетокот имаше минимална предност од 4-2. Последното водство на домаќините беше при резултат 10-9, по што Прилеп направи серија од четири гола и го преврте резултатот во своја корист. На полувреме заминаа со водство од 14-16, кое го обезбеди Димитриоски.

И вториот дел започна во знак на Прилеп, но Пролет успеа да се врати, а при 25-25 Палевски промаши клучен зицер. Прилеп повторно се одлепи на два гола, домаќините израмнија, но во пресудните моменти Кастратовиќ презеде одговорност и со два гола ја запечати победата.

Кај Прилеп најрасположени беа Димитриоски со седум и Квастек со шест гола, додека кај Пролет најдобар стрелец беше Палевски со девет погодоци, пред капитенот Андоновски кој постигна седум.