Каталонските медиуми кои се блиски до управата на клубот каок „Спорт“ и „Мундо Депортиво“ пишуваат за причините поради кои пукна на релација тренер – соблекувална, односно како Кике Сетиен ја загуби поддршката од Лионел Меси и останатите фудбалери.

Постојани промени во формацијата: Сетиен тргна со формација 3-5-2, потоа премина на 4-3-3, па ја смени во 4-4-2 и на крај играше со 4-3-1-2.
Чудни тренинзи: Фудбалерите често не можеа да сфатат што сака да направи Сетиен на тренинзите и што бара од нив на натпреварите. Токму поради различните и нејасни тренинзи по ремито со Селта изби голема караница во соблекувалната.

Лоши ротации: Тренерот кој претходно го предводеше Бетис и според медиумите не е дораснат за клупата на гигант како Барселона, постојано грешеше со измените. Сетиен користеше најмал фонд на играчи и соблекувалната смета дека мораше повеќе да ротира.
Артур: Ниту еден од староседелците во Барселона не го одобри трансферот на Артур во Јувентус.
Контрадикторни изјави: На секоја изјава на Меси по натпреварите во која зборуваше дека со ваква игра не може да се освои Лигата на шампионите, Кике Сетиен веќе наредниот ред даваше спротивна изјава.
Нереализирани ветувања: Сетиен на клупата на Барселона дојде како голем поддржувач на филозофијата на Јохан Кројф, повторуваше дека сака неговиот тим да ја игра препознатливата тика-така, дека неговиот тим сака да игра убав фудбал за око, но се случи спротивното.

Едер Сарабија: На фудбалерите не им се допаѓа избувливиот карактер и некултурно однесување на помошниот тренер. Сарабија често влегуваше во конфликти со своите фудбалери, а Кике Сетиен сетоа тоа немо го гледаше и не интервенираше.
Кој е виновен за слабите игри и резултати: Додека Лионел Меси и останатите фудбалери по секој неуспех ги признаваат сопствените грешки, Сетиен ниту еднаш не ја призна вината и за се го обвинуваше ВАР.