Пред две години го поддржа Бајден: Тејлор Свифт ги повика обожавателите да гласаат во рамки на „супер вторник“ во САД
Американската кантавторка Тејлор Свифт ги покани своите фанови да гласаат на денешните првични избори на Републиканската и Демократската партија во Тенеси, каде што живее, како и во останатите 15 американски држави.
„Сакам да ве потсетам да гласате за луѓето кои се ваши најдобри претставници. Ако веќе не сте, планирајте да гласате денес“, напиша таа во објавата на нејзиниот инстаграм-профил.
Свифт го поддржа актуелниот претседател Џозеф Бајден на претседателските избори во 2020 година, како и демократските кандидати во Тенеси во 2018 година, пренесува новинската агенција „Асошијетед прес“.
Денеска во САД е „супер вторник“, централниот ден на кампањата за претседателските номинации на Демократите и Републиканците, бидејќи во 16 американски сојузни држави се одржуваат прелиминарни избори на двете најголеми партии во САД.
Повеќе од една третина од вкупниот број делегати се освоени на изборите во „супер вторник“, а републиканскиот кандидат може да освои 854 од вкупно 2.429 делегати, додека Демократите можат да освојат 1.420, што е исто така повеќе од една третина од делегатите.
Поранешниот претседател Доналд Трамп, кој е фаворит за номинација на Републиканците, сега има 122 делегати и му требаат уште 1.093 за да ја достигне потребната „волшебна“ бројка од 1.215. Бајден, фаворитот на Демократите, сега има 206 делегати и има потреба од 1.986.