На малата сцена на Театар Комедија на 3 декември премиерно ќе биде изведена театарската претстава „Анна“ според истоимениот драмски текст на Драгана Лукан Николоски, а во режија на Нина Николиќ.

Станува збор за праизведба на текстот којшто е дел од проектот „Трилогија за љубовта“ на авторката Драгана Лукан Николоски во кој се содржани уште и драмите „Марта Верина“ и „104“.

Драмата е инспирирана од „Ана Каренина“, но не претставува нејзина драмска адаптација. Дали светот е навистина променет, дали ние луѓето сме навистина променети, дали денеска после 150 години Ана има шанса да победи?

Ана има сè – углед, стабилност, совршено семејство. Но зад затворените врати се крие една друга вистина: таа е невидлива во својот живот. Кога се среќава со Алексеј, страста ѝ дава илузија за слобода. Но, дали навистина може да се ослободи?

Тоа е драма за жената која избира да има избор и да ја плати цената на својата одлука. За бракот во кафез и бунтот кој станува ново ропство. За вечното прашање: што губиме кога се обидуваме да се најдеме?

Во претставата играат: Маја Љутков, Благој Веселинов, Саша Ханџиќ и Маја Зеќо. Сценографијата е на Илина Ангеловска, костимите на Ивана Каранфиловска Угуровска, а музиката на Оливер Јосифовски.

Проектот е поддржан од Министерството за култура и туризам на РСМ и од Гете институтот, а се реализира како копродукција помеѓу „Перипетија продукција“ и Театар Комедија.