Пожар во трговски објект во бугарскиот туристички комплекс Боровец денеска резултираше со едно повредено лице, информира Областната дирекција на МВР во Софија, повикувајќи се на БТА.

Повредениот е пренесен на лекување во болница во Софија, каде му се констатирани изгореници на нозете.

Пријавата за пожарот била примена околу 12:30 часот, по што на терен веднаш биле испратени полициски и противпожарни екипи.

Огнот е изгаснат, а во тек се увид и активности за утврдување на причините за настанувањето на пожарот.

Од управата на туристичкиот комплекс соопштија дека вработените во трговскиот објект биле навреме евакуирани и дека нема други повредени лица.