Почнува ПИН музичката конференција и „шоукејс“ на фестивалот „Таксират“
Во рамките на фестивалот „Таксират“ од 24 до 26 ноември во Младинскиот културен центар во Скопје ќе се одржи ПИН – единствената меѓународна музичка конференција и „шоукејс“ во нашата држава.
„Таксират“ и „Пасворд Продакшн“ во рамките на деветтото издание на ПИН се домаќини на повеќе од 250 гости, кои се едни од најрелевантните имиња во музичката индустрија (букери, промотери, новинари, агенти) и на најактуелните музички таленти од Европа, регионот и од кај нас.
Во текот на овие три фестивалски дена, сите посетители ќе имаат шанса да ја проследат дневната панел-програма во „Кино Фросина“, каде ќе се дискутира на топ-теми во индустријата, трендови поврзани со музичката сцена, продукцијата, културата и сите влијанија на неа. Влезот на конференцијата е бесплатен со задолжителна регистрација.
Вечерната концертна програма, која ќе го разигра Скопје со звукот на млади и талентирани артисти, внимателно избрани да донесат разновидни звуци за создавање на добра забава до доцна во ноќта, исто така, ќе може бесплатно да се проследи.
ПИН музичката конференција е организирана со поддршка од Центарот на европската мрежа за размена на музички иновации (HEMI Music Hub), проект кофинансиран од програмата „Креативна Европа“ на Европската Унија.