Телевизијата „Вистел“ на митрополитот на МПЦ-ОА Петар, односно Петар Каревски, денеска почна да зрачи во етерот, а меѓу првите содржини пуштени на програмата утринава е документарен филм со Македонци кои отишле во Русија да бараат жени, објави „Макфакс“.

Во документарецот се следат повеќе мажи од Македонија, кои одат во Русија за да бараат невести.

„Не ми се свиѓаат Македонките. На некој начин не се ни домаќинки, воопшто не ми се свиѓаат за живот со нив“, раскажува еден од мажите, кој за себе вели дека живеел во Англија, па се вратил во Македонија.

Во еден дел од документарецот се појавува и самиот владика, во сцена од црква.

На одјавната шпица под „соработници“ е наведена Преспанско-пелагониската епархија, додека под „посебна благодарност“ пишува: „до неговото Високопреосвештенство митрополит Австралиски и Новозеладски г. Петар“. Според шпицата на документарецот, тој бил поддржан од Филмскиот фонд.

Телевизијата „Вистел“ е сопственост на фирмата „Преобразба ДООЕЛ Скопје“, чиј сопственик е Петар Каревски. Владиката пред една недела рече дека јавноста не би требало да ја интересира како се финансира телевизијата, која ќе емитува постојана програма.