Денеска во Скопје на 82 години почина Кирил Темков, познат македонски филозоф и етичар. Под негово менторство генерации студенти на Филозофскиот факултет ја добија својата наобразба. Темков беше влијателен и ценет во регионот. Поборник беше да се воведе предметот Етика во училиштата а неговите учебници се четивата според кои се  изведува наставата по Етика во основните и во средните училишта во државата.

Темков е роден во 1943 година во Кавадарци. Образованието го завршил во Скопје и во Белград. Дипломирал во  1968 година и докторирал филозофија во 1982 на Универзитетот „Свети Кирил и Методиј“ во Скопје. Беше асистент, предавач, вонреден и редовен професор по Етика, Естетика, Филозофија на менаџерството, Филозофија на политиката, Еколошка етика, Биоетика, Менаџерска етика, Педагошка етика и Филозофија на образованието при Институтот за филозофија на Филозофскиот факултет во Скопје.