Македонската музичка сцена остана без уште едно големо име. Вчера почина Петар Исиров Пјотр, во јавноста познат како Перо Кокер, прекар што го доби поради неговата посветеност и неверојатната сличност во изведбите со неговиот идол Џо Кокер.

Петар повеќе од три децении ја збогатуваше локалната музичка сцена со настапи по клубови, кафулиња и фестивали, носејќи ја магијата на блузот и рокот. Минатата година, со својот деветчлен бенд, на „Котон блуз фестивал“ одржа концерт во чест на Џо Кокер, кој многумина го опишаа како автентично и незаборавно доживување.

Веста за неговото заминување предизвика бројни реакции од колегите музичари и пријателите. Гитаристот Петар Ренџов го опиша како „бунтовник, хипик, рокер… ловец и плен во блузот на градот“, а социјалните мрежи се преполнија со емотивни пораки и сеќавања, меѓу кои и оние на македонските пејачки Нина Јанева, Биба Додева, Вера Јанковиќ и Елена Петреска.

– Пјотр Исиров – бунтовник , хипик , рокер , „Кокер“ , Џокер , ноќна птица, и ловец и плен – во блузот на градот заглавен, тлее и живее за секоја секунда да пее, за сите другар – за себе си без никаков ќар …. Почивај во мир друже , светол ти патот кон небото… Сочувство до Нина и Павел!“ – напиша Петар Ренџов на својот профил на Фејсбук.

Перо Кокер ќе остане запаметен како човек кој живееше за музиката, човек кој на сцената оставаше сè од себе и кој со својата харизма и глас го допираше срцето на публиката.