Почина Масимо Савиќ
Почина познатиот хрватски музичар и пејач Масимо Савиќ, соопшти неговото семејство. Имаше 60 години. Савиќ починал во болницата во Виноград каде се лекувал од рак на белите дробови.
„Нашиот татко, сопруг, гордост и љубов, Масимо Савиќ, нѐ напушти по кратка, но херојска борба. Иако го напушти овој свет, вечно ќе живее во нашите души; насмеан, топол, силен, полн со љубов и исткаен од уметност.Ние ќе бидеме ваши девојки засекогаш. Ани и Мирна“, објавија неговата сопруга и ќерка на неговата официјална страница.
View this post on Instagram
Тажната вест ја потврди и дискографската куќа „Aquarius Records“.
Од Савиќ се прости и Бобан Милошески, од „Авалон“
„Мојот пријател Масимо не може да умре.Тој само замина да шири добрина и да пее моќно и од срце… како само тој може, на некое друго место. Овде даде и премногу од себе… засекогаш“ – напиша првиот човек на продукција.
Со емотивни зборови од Савиќ се простуваат неговите колеги. Сите ги споделуваат своите искуства со Савиќ, а имаат едно нешто заедничко – на сите ќе им недостига!
Меѓу оние кои на социјалните мрежи се простија од Масимо е и Марија Шерифовиќ.
„Драг Масимо, беше искрена чест да Ве познавам и со Вас да разговарам за музика. Нека ви е вечна слава“, напиша Шерифовиќ.
Нина Бадриќ објави видео од неа и Савиќ снимено од телевизијата ХРТ. Тие заедно го изведоа хитот на Масимо „Странац у ночи“.
„Кога ќе останеш без зборови. Искрено сочувство на семејството. Засекогаш ќе бидеш тука“ – напиша Бадриќ.
И Тончи Хуљиќ се прости од големиот Савиќ.
View this post on Instagram
„Драг пријателе…“ – напиша Хуљиќ покрај фотографијата на Масимо на која пејачот е насмеан.
Многумина го паметат токму по таа насмевка.
Пејачот Џибони запали свеќа за својот починат колега.
„Запалив свеќа за нашиот добар Масимо. Прерано, несфатливо прерано… Господ да му ја упокои душата“ – напиша Џибони на Фејсбук.
Масимо е роден на 6 јуни 1962 година во Пула, а средното образование го завршил во Загреб, каде што ја започнал својата музичка кариера. Во 1983 година, како водач на легендарната њу вејв/синт-поп група Доријан Греј, го издаде својот прв албум – „Сјај у тами“, а две години подоцна вториот албум „За твоје очи“.
Своето детство го поминал на Истра. На 12 години отишол во Милано, а после тоа со брод од Џенова, со мајка си тргнале на патување со брод во Австралија. Во Сиднеј, тој живеел во богато семејство две и пол години, каде неговата мајка Елде работела како шеф на послугата. Малиот Савиќ во Сиднеј отишол во Белви Хил, а во седмо одделение се вратил на Истра. Меѓутоа, тој го заборавил хрватскиот јазик во Австралија и повторно почнал да го учи кога се вратил.
Во 2013 година одбележа 30 годишен јубилеј од својата кариера, а последниот концерт го одржа во Арена Загреб на 5 ноември 2022 година.
