Платформа за родова еднаквост: До 8 март да се поднесат кривични пријави против сторителите во „Јавна соба“
Очекуваме до 8 март да започне постапката против сторителите во случајот „Јавна соба“. Во спротивно повторно ќе излеземе на протест, изјави на денешната прес-конференција Бојана Јовановска од Платформата за родова еднаквост.
– Очекуваме итна испорака на конкретни резултати по нашите барања со рок до 8 март и за полнолетните жртви од случајот, а не само за делото производство и дистрибуција на детска порнографија. Очекуваме кривични пријави од МВР за сторителите од „Јавна соба“ за делата – Поседување на лични податоци, посредување при вршење проституција, загрозување на безбедноста или ширење на расистички и ксенофобичен материјал во однос на околностите од случајот – додаде Јовановска.
Таа од пред зградата на МВР испорача уште неколку барања до министерот Оливер Спасовски.
– Очекуваме процес на прочистување на полицијата од полициски службеници кои се сторители на насилство врз жени и нивно санкционирање, како и за оние полициски службеници кои пропуштиле да преземат мерки, но и континуирана стручна едукација за постапување во родово базирано насилство. Очекуваме измени со внесување на специјални одредби и конечно да започне со работа телото Омбудсман плус. На маршот на 8 март ќе побараме отчет врз основа на овие барања, како и оние кои ќе ги доставиме до Јавното обвинителство следната среда – заклучи Јовановска.
Од Платформата за родова еднаквост истакнаа дека засега полицијата само им ги „замачкала“ очите на граѓаните, а вистинските жртви и натаму се чувствуваат незаштитени.