Судењето на поранешната министерка за култура Елизабета Канческа-Милевска во случајот „Тендери“ ја изминува петтата година, а денешното рочиште одново се одложи.

Откако стигна супервештачењето од Бирото за судски вештачења, сега на рочиштето не се појавил вештакок кој требало да сведочи, по што ново рочиште е закажано за 23 дена, објави „Макфакс“.

Предметот досега петпати се судеше одново, поради тоа што изминале 90 дена од последното одржано рочиште.

Обвинението во предметот „Тендери“ е поради фаворизирање на градежната компанија „Бетон“ во јавните набавки. Покрај Канческа-Милевска, обвинети се и двајца членови на комисијата за јавни набавки, за злоупотреба на службената положба и овластувањето.

Ексминистерката за култура беше меѓу осумтемина пратеници на ВМРО-ДПМНЕ кои во 2018 година ја „сменија страната“ во Собранието и гласаа за промената на името на државата. Во јавноста се шпекулираше дека тие за возврат за политичката „услуга“ со гласањето за уставните измени, добиле различни повластици и контрауслуги од актуелната власт – од државни тендери, до прекин на кривично гонење.