Капитенот на македонската репрезентацијата Горан Пандев е разочаран што фудбалерите не успеаја да дојдат до историско реми против Австрија иако на 13 минути до крајот резултатот беше израмнет.

– Како за прв натпревар на ЕП, за нас ова е едно големо искуство, одигравме одлични 70 минути. Знаевме дека Австрија ќе притисне, тие се помоќни од нас, имаат добра клупа, но одлично се државме се до оној несреќен втор гол. Примивме еден несреќен втор гол, па натпреварот беше решен. Имавме можност за позитивен резултат, но не издржавме во последните минути од натпреварот. Но, не смее да има разочарување. Шансите не се загубени, треба добро да се одмориме. Не чека уште еден тежок натпревар против Украина, на кој мора да играме отворено и да одиме на победа затоа што нема што да загубиме. Искрено, многу ми е жал за навивачите кои дојдоа тука и за онаа прекрасна поддршка од трибините, им благодарам од срце. Ние го дадовме максимумот, се надевам дека на следните натпревари ќе бидеме уште подобри – изјави Пандев кој ќе остане запишан како стрелец на првиот гол за Македонија на ЕП.

ВИДЕО I ЕВРО 2020: Пораз на Македонија на деби настапот на ЕП