Претседателскиот кандидат на ДУИ и Европскиот фронт, Бујар Османи на прес-конференција во изборниот штаб во Мала Речица прогласи победа над албанската опозиција во сите општини а разликата вели е над 40 илјади гласови.

-Му порачувам на Таравари да го признае поразот. Но, факт е дека ако не се поделевме ќе имавме кандидат Албанец во вториот круг од претседателските избори, изјави Османи.

Неговиот впечаток е дека граѓаните пак гласале по етничка линија, но како што кажа, „овој Европски фронт е наша локомотива за пат кон ЕУ“.

– Победивме во сите поголеми градови и општини во земјата. Денешниот глас е аманет за нас и ќе биде одлука за идните политики на државата. Денеска Албанците, Турците, Бошњаците, Ромите покажаа дека сами одлучуваат за својата судбина и никогаш нема да дозволат некој друг да одлучува за нив. Волјата на народот денеска е јасна и треба да се почитува од сите, додаде Османи.