Општина Карпош додели 80 пакети за социјално загрозените семејства
По повод 3 Ноември – Денот на Општина Карпош, локалната самоуправа денеска додели 80 пакети со трајни прехранбени продукти и средства за лична хигиена и дезинфекција за своите сограѓани кои се наоѓаат во социјален ризик.
Седумдесет пакети ќе бидат поделени на домаќинства во социјален ризик, пет пакети на СОС Детско село, а пет пакети на Геронтолошки завод „13 Ноември” (во Злокуќани). Акцијата е спроведена во соработка со Црвениот крст на Град Скопје.
Како што истакна денеска градоначалникот на Општина Карпош, Стефан Богоев, за 20 отсто е зголемен бројот на лица кои се пријавуваат во општината како социјално загрозени.
– Ние во повеќе наврати изминатиов период даваме помош на оние на кои им е најпотребно. Дониравме крвни единици, доделивме еднократна социјална помош, како и заштитни маски за граѓаните кои живеат во поруралните средини. Оваа светска пандемија повикува на одговорност, но и на поголема хуманост и солидарност на секој еден од нас, рече Богоев.
Генералниот секретар на Црвен крст, Саит Саити изјави дека соработката меѓу Општина Карпош и Црвениот крст секојдневно се интензивира. Исто така, пунктот за бездомни лица во Момин Поток обезбедува згрижување и топол оброк за луѓето од оваа социјална категорија. Подготовката на волонтерите е на високо ниво и тие секојдневно работат со оние кои се најпогодени.
На денешната средба градоначалникот Богоев и службите за социјална заштита на Општината предложија и организирање на акција за собирање на облека, во која ќе биде вклучена општинската администрација.