Оливер Вархељ: Косово ги исполни условите за либерализација, ние мора да ги убедиме земјите членки на ЕУ
Еврокомесарот за проширување и добрососедство, Оливер Вархељ денес за време на престојот во Косово рече дека прават напори граѓаните на Косово да добијат визна либерализација, но за ова земјите-членки на ЕУ мора да бидат убедени.
„Ние се обидуваме да ги убедиме земјите-членки да понудат либерализација на граѓаните на Косово, бидејќи останува нашата процена дека сте ги исполниле сите услови, но само нашата процена не е доволна, ние мора да ги убедиме земјите-членки. Ова може да се постигне само преку работа и премиерот го прави тоа, за да нема злоупотреба на азил.“ изјави Вархељ.
Премиерот Авдула Хоти изјави дека за четири месеци откако тој раководи со владата зборот корупција е тргнат од јавниот дискурс. Тој додаде и дека за дијалогот со Србија многу е важно постоењето на социјален консензус. Сепак, доколку нема конечен договор Косово и Србија ќе останат како две независни соседни држави кои не се признаваат.
„Ние сме посветени на дијалог 1 месец 2 месеци 2 години. Ако не постигнеме конечен договор, нема што да правиме, продолжуваме како две независни соседни држави кои не се познаваат едни со други“ рече Хоти.
Еврокомесарот се состана и со претседателката на косовскиот парламент, Вјоса Османи, а потоа одржа говор пред членовите на Собранието на Косово. Таа пред пратениците во собранието рече дека состојбата со визната либерализација за граѓаните на Косово не и прави чест на Европската унија.
„Косовските институции се свесни дека патот кон ЕУ бара посветеност далеку од зборови, бара конкретни активности, координација и точност во спроведувањето на нашите обврски. Ние разбираме дека процесот на евроинтеграција е маратон, но дури и маратонот има крај. Цела една деценија, косовските институции не само што се обидоа да ги исполнат критериумите потребни за визна либерализација, туку ги исполнија сите, како што ги прифати и самата Европска комисија. Значи, нелиберализацијата на визите не им претставува чест ниту на самата Европска унија ниту на земјите-членки. Маратонот што го започнавме во 2018 година треба да има епилог. Потребен ни е маратонец кој ќе даде порака дека граѓаните чекаат со години, бидејќи на Косово сега му треба визна либерализација“, рече Османи.
Оливер Вархељ не се сретна со претседателот Хашим Тачи.