Официјално: Александар Васоски е новиот тренер на ФК Вардар
Фудбалскиот клуб Вардар денеска објави дека нов тренер на екипата е Александар Васоски – Тетовче, играчка легенда на клубот и човек под чие водство ФК Вардар ја освои последната шампионска титула во 2019 година.
Покрај него, во клубот се враќа и големата спортска легенда Ѓоко Хаџиевски, најтрофејниот Вардаров тренер и човекот кој со „црвено-црните“ има освено вкупно пет шампионски титули и два национални куп трофеи.
Од клубот веруваат дека Хаџиевски со неговото богато интернационално тренерско искуство и знаење, ќе биде од огромна помош за тренерот Васоски, но и за целокупниот тим.
– Особено нè радува искрениот пристап на двајцата тренери, кои веднаш и без размислување ја прифатија понудата на клубот. Сметаме дека спојот на професионализам и искуство и на желбата и знаењето, ќе биде темелот врз кој во понатамошниот период ќе се развива клубот, градејќи го постепено потребниот победнички менталитет – информираат од ФК Вардар.
Првиот официјален натпревар за тренерот Васоски, како и за Хаџиевски ќе биде во среда, во рамките од Првата македонска лига против Силекс од Кратово на стадионот „Борис Трајковски“ во населбата Маџари во Скопје со почеток од 16.30 часот.