Затворениот курдски лидер, Абдула Оџалан, денеска изјави дека е „клучно“ за турската влада да посредува во мировен договор меѓу Сириските демократски сили (SDF) предводени од Курдите и владата во Дамаск, пренесува АФП.

Судирите меѓу сириските сили и СДФ фрлаат сомнеж врз договорот за интегрирање на борците на групата во армијата, кој требаше да стапи на сила до крајот на годината.

Оџалан, основач на милитантната група Курдистанска работничка партија (ПКК), ја повика Турција да помогне во спроведувањето на договорот објавен во март меѓу SDF и сириската влада, предводена од поранешниот џихадист Ахмед ал-Шара, чии сили го соборија долгогодишниот владетел Башар ал-Асад минатата година.

„Од суштинско значење е Турција да игра улога на олеснувач, конструктивно и насочено кон дијалог. Ова е од витално значење и за регионалниот мир и за зајакнување на сопствениот внатрешен мир“, наведува Абдула Оџалан во својата порака напишана и датирана на 30 декември.

„Основниот услов утврден во договорот потпишан на 10 март помеѓу Сириските демократски сили и владата во Дамаск е демократски модел што им овозможува на народите да се управуваат заедно. Овој пристап вклучува и основа за демократска интеграција што може да се преговара со централните власти. Спроведувањето на договорот од 10 март ќе го олесни и забрза овој процес“, пишува тој.

Договорот потпишан во март помеѓу Курдите и централното сириско раководство предвидува интеграција на курдските институции во централната влада и, пред сè, интеграција на курдските воени сили во сириската армија.

Договорот требаше да биде спроведен до крајот на годината, но преговорите се заглавени.

Лидерот на сириските Курди, Мазлум Абди, во четвртокот изјави дека прави сè што е можно за да спречи пропаѓање на договорот.

Тој ги повтори барањата на Сириските демократски сили за децентрализација, кои беа отфрлени од централната влада под водство на Ахмед ал-Сара, кој го собори Башар ал-Асад во 2024 година.

Турскиот министер за надворешни работи, Хакан Фидан, ги повика Курдите да го спроведат договорот и да не станат „пречка за стабилноста на земјата“.

Анкара, која го смета присуството на курдските борци на турско-сириската граница како закана и спроведе три воени операции во Сирија помеѓу 2016 и 2019 година, неодамна ги предупреди Курдите дека партнерите на договорот „го губат трпението“.