Округла муцка, мал врв на носот, очи од копчиња и две меки, заоблени уши – токму овие карактеристики го прават мечето една од омилените играчки кај многу деца.

Оваа, типично американска играчка настанала во 1902 година од парчиња ткаенина што ги шиеле Морис и Роуз Михтом, сопственици на слаткарница во Бруклин, пишува „АП“.

„Ништо не зборува за детството подобро од мечето. Тоа е целосно родово неутрална играчка. Ја прифаќаат и момчиња и девојчиња“, вели Мајкл Кимел.

Приказната за настанувањето на мечето започнува уште порано истата година. Претседателот Теодор Рузвелт одбил да застрела црна мечка за време на лов. Карикатуристот Клифорд Бериман објавил политичка карикатура што ја прикажала одлуката на Рузвелт и го привлекла вниманието на брачниот пар Михтом. Тие добиле инспирација да создадат играчка што подоцна била наречена „мечето на Теди“ (Teddy’s Bear), како омаж на претседателот и неговиот прекар.

Така настанала омилената детска играчка. Откако продале неколку примероци, Михтомови почнале да добиваат сè повеќе нарачки, а наскоро се појавиле и копии. Мечето се смета за првата играчка што не била само крпена кукла или порцеланска фигура. Било со достапна цена, смирувачко и прилагодено за детски раце.

Во тоа време, некои дури стравувале дека плишаните играчки би можеле на некој начин да ги расипат младите девојчиња и да им ја намалат желбата еден ден да станат мајки.

Со децении, мечето стана вистинска икона. Елвис Присли пееше дека сака да биде нечие „љубовно мече теди“ (loving teddy bear). Еден оригинален примерок направен од Михтомови има почесно место во Националниот музеј на американската историја при Смитсонијан. Изразот „теди мече“ (teddy bear) со текот на времето стана синоним за личност која е блага и нежна.

Во исто време кога мечето станувало популарно во САД, слична играчка се развивала и во Германија. Компанијата „Steiff“ започнала производство на плишани мечиња на почетокот на 20 век, а нивниот модел со подвижни делови брзо привлекол внимание на меѓународниот пазар. Така, иако „теди“ мечето го добило своето име во Америка, неговиот развој како играчка паралелно се одвивал и во Европа.