Вознемирувачка аудио снимка објавена од американските медиуми открива како полицајците од Транспортната управа во Мериленд ги блокирале возилата што поминувале преку мостот Френсис Скот Ки во Балтимор во последен момент, само неколку моменти пред да се урне.

Речиси целиот мост долг 2,6 километри се урнал за само неколку секунди откако во него удрил контејнерскиот брод Дали, кој пловел под знамето на Сингапур. Дали останал без струја и погон веднаш по испловувањето од пристаништето Балтимор, за што веднаш ја известил управата за транспорт во Мериленд.

„Мораме да го запреме целиот сообраќај, од двете насоки“, вели полицаецот на драматичната снимка објавена од Одделот за транспорт во Мериленд. Веднаш по прекинот на сообраќајот, на аудио снимката се слуша како полицајците зборуваат за работниците кои останале на мостот.

„Целиот мост само се урна“, вели диспечерот набргу потоа.

Градоначалникот на Балтимор вчера изјави дека полицајците кои го блокираа сообраќајот на мостот пред несреќата се „херои“.

Нуркачите денеска ќе бараат шест работници за кои се претпоставува дека загинале во водите околу остатоците од урнатиот мост во пристаништето Балтимор, објавија локалните власти.

Ударот на контејнерскиот брод на мостот, кој предизвика негово уривање, предизвика и затворање на пристаништето Балтимор на неопределено време. Тоа е едно од најпрометните пристаништа на источниот брег на САД, а катастрофата предизвика сообраќаен хаос во Балтимор и околниот регион.