Денеска на Јутјуб е објавена видеоснимка на која се гледа како во домашна атмосфера седи Бојан Јованоски-Боки 13 заедно со поранешната специјална обвинителка Катица Јанева и уште една личност снимена одзади, за која, како се тврди на социјалните мрежи, е Радмила Шекеринска.

Видеото е објавено од корисник на Јутјуб со име „Боки и другарките другари-ки“ и трае 29 секунди.

Снимката најверојатно е направена со мобилен телефон од четврта личност во, како што се претпоставува, домот на Бојан Јовановски.

На почетокот на видеото испишано е „На гости кај Боки 13, Катица Јанева и?“ алудирајќи на прашањето која е третата личност која се гледа свртена со грб.

Во предизборниот период речиси секојдневно на јутјуб-каналот се објавуваат аудио и видеоснимки, во јавноста познати како „бомби“. Снимките се публикувани под различни имиња за различни цели.

Јовановски и Јанева на 18 јуни годинава беа прогласени за виновни во случајот „Рекет“ и им беа изречени затворски казни со првостепена пресуда. За Јовановски 9 години за делата примање награда за противзаконито влијание и за перење пари, а за Јанева 7 години за злоупотреба на службената положба и овластување.

Видеото погледнете го на следниот линк.