После долг и исцрпувачки период на раскол и поделеност помеѓу клубовите, конечно сите клубови членки на Национална пливачка федерација (НПФ) најпрво седнаа на една маса, одржаа редовно Собрание кое помина во најдобар можен ред и во конструктивна атмосфера, со доста емоции за кои се верува дека се произлезени од љубовта кон спортот, а потоа и се натпреваруваа на едно заедничко првенство како што доликува.

Заслугата секако може да се препише на работата и отвореноста актуелното раководство на федерацијата, но и на добрата волја на сите клубови да партиципираат во работата за доброто на пливачите, спортот и сите кои се вклучени околу него.

На собранието беа донесени доста важни одлуки, повеќето со консензус, некои со надгласување или промени на лице место, но најважно е што беа усвоени и предлози од сите заинтересирани страни. Собранието како највисоко тело донесе и ад-хок одлуки за некои прашања за кои нормално и не се дискутира на собрание, но со тоа се покажа добрата волја на сите инволвирани да се продолжи понатаму со работа во позитивна атмосфера.

Многу важно за НПФ е што се реафирмира иницијативата за возобновување на ватерполо спортот во Македонија. Формиран е нов одбор за ватерполо кој самостојно ќе работи најпрво на уредување и организирање на правилата по кои ќе функционира ватерполо спортот во Македонија. Реактивирано е членството на два постари ватерполо клубови Младост и Локомотива.

На ред се ентузијастите од ватерполо одборот да го завршат формалниот дел од работата и да ја достават потребната документација.

– Кога институциите на државата не си ги исполнуваат своите обврски, товарот секогаш паѓа врз граѓаните, односно во случајов – пливачите. Во ваква ситуација веќе долги години се наоѓа НПФ и за жал на сите повици на НПФ Институцијата задолжена за спорт АМС не комуницира и нема волја да го реши проблемот, односно избегнува да ги изврши работите за кои е задолжена со закон и со Устав – да се грижи за спортот. Во вакви услови со енормно зголемени трошоци, одржано е Летното национално првенство за младинци и сениори на олимпискиот базен во Скопје. Можеби имаше и некои пропусти од технички аспект, сепак имаме испливани одлични резултати и неколку рекорди – објавуваат од НПФ.

Федерацијата искажува искрена благодарност до сите ентузијасти, спортисти, спортски работници, а особено родители, вистински вљубеници во пливањето кои доброволно одвоија дел од своето време и способност да помогнат во што е можно подобра организација на натпреварот.

– За жал постојат и такви луѓе во и околу пливањето кои се подготвени само да стојат од страна, со ништо да не придонесат за подобра организација, а во исто време се први кои ќе го критикуваат и омаловажуваат трудот на останатите. Тренерите треба да бидат максимално посветени на работата со пливачите, нема потреба дополнително да им се отежнува работата со тоа што ќе треба да работат и со родителите, поточно на нивното однесување во и надвор од базенот. Децата најдобро се воспитуваат со личен пример – стои во објавата на НПФ.