Сојузникот на рускиот претседател Владимир Путин го предупреди НАТО дека поразот на Русија во Украина може да предизвика нуклеарна војна, додека поглаварот на Руската православна црква рече дека светот ќе заврши ако Западот се обиде да ја уништи Русија, пренесува Ројтерс.

Таквата реторика има за цел да ја одврати воената алијанса НАТО предводена од САД уште повеќе да се вклучи во војната, во пресрет на состанокот на украинските сојузници на кој ќе се разговара за испраќање на повеќе оружје за Киев.

Но, експлицитното признавање дека Русија би можела да загуби на бојното поле означи редок момент на јавен сомнеж од истакнатиот член на внатрешниот круг на Путин.

„Поразот на нуклеарна сила во конвенционална војна може да предизвика нуклеарна војна“, рече поранешниот руски претседател Дмитриј Медведев, кој служи како заменик-претседател на моќниот совет за безбедност на Путин, во објавата на Телеграм.

„Нуклеарните сили никогаш не изгубиле големи конфликти од кои зависи нивната судбина“, рече Медведев, кој беше претседател од 2008 до 2012 година.

Медведев рече дека НАТО и другите одбранбени лидери, кои треба да се сретнат во петок во воздухопловната база Рамштајн во Германија, за да разговараат за стратегијата и поддршката за обидот на Западот да ја порази Русија во Украина, треба да размислат за ризиците од нивната политика.