Новиот сингл на „Код 369“ носи мистична атмосфера на месечева ноќ (ВИДЕОСПОТ)
Битолскиот состав „Код 369“, кои полека, но сигурно, стануваат регионално препознатливи, снимија сингл и спот за песната „Мјесечина“. Станува збор за нивниот втор сингл издаден на хрватски јазик за „Кроација Рекордс“.
Видеото во продукција на „Encore Media Production“ и Дејан Трајчевски јасно ја пренесува мистичната атмосфера на месечева ноќ. Овојпат, фронтменката на групата, Ирена Димовска, го испеа „искрениот порив на секое човечко суштество да ги надмине личните и општествените очекувања со инспирација и трудољубивост“, посочуваат од „Кроација Рекордс“.
Групата „Код 369“ е продолжение на долгогодишните музички активности на членовите на групата „Памперс“, а со новиот проект тие во својата музика внесуваат нови музички моменти на фанк, џез и класични инструментализации, кои се преплетени во препознатливата рок-база.
Со уникатен израз помеѓу алтернативниот рок и комерцијалната рок и поп-музика, „Код 369“ ги воодушевуваат слушателите со своите авангардни идеи. Текстот за новата песна го напиша пејачката Ирена Димовска, музиката е на Даниел Митревски, а за аранжманот, покрај Митревски, се задолжени Иле Лулевски и Коста Стеваноски.
– Во нивните текстови може да се препознаат универзалните човечки и литературни вредности, љубовта како движечка сила и силата на поединецот како движечки порив кон најдоброто во себе – истакнуваат од „Кроација Рекордс“.
(Текстот е објавен во „Културен печат“ број 158, во печатеното издание на весникот „Слободен печат“ на 10-11 декември 2022)