Нови проблеми за Бајден, мигрантите изградија свои кампови во Тексас
Илјадници мигранти пристигнаа под мостот што ги поврзува градовите Дел Рио во Тексас и Акуна во Мексико, а тие веќе поставиле импровизиран камп, со што му нанесоа нова главоболка на американскиот претседател Џо Бајден со кој тој ќе мора да се соочи.
Температурите во близина на градот се искачија и до 37 Целзиусови степени, а луѓето се соочуваат со многу мали количини на храна и вода, па стотици мигранти беа принудени да го преминат Рио Гранде и да се вратат во Мексико за да се снабдат со основните намирници, кои, според новинарите на Ројтерс, не ги добиваат во САД.
Мигрантите се претежно од Хаити, но има и лица од Куба, Венецуела и Никарагва.
Тешки услови на границата
Тешките услови на границата го одразуваат хуманитарниот предизвик со кој се соочува Бајден, додека бројот на уапсените на границата е најголем во последните дваесет години. Американските власти минатиот месец уапсија повеќе од 195.000 мигранти на границата со Мексико, според владините податоци објавени во средата.
Царинската и граничната служба не одговорија на прашањето колку луѓе има во кампот во Дел Рио, а еден службеник во средата за Ројтерс изјави дека таму има околу 6 илјади луѓе.
Граничната патрола рече дека го зголемува бројот на персонал во Дел Рио за да обезбеди „безбеден и хуман третман“. Обезбедена е вода за пиење и преносни тоалети за мигрантите, се додава во соопштението.
Бајден отфрли многу строги мерки на Трамп
Американскиот претседател Бајден отфрли многу од строгите имиграциски мерки воведени од неговиот претходник, Доналд Трамп.
Сепак, Бајден се најде меѓу про-мигрантските групи и некои демократи кои го критикуваат дека не направил доволно за да им помогне на мигрантите од една страна, и противниците кои велат дека неговата политика поттикнала илегална имиграција, од друга страна.
Дел Рио се наоѓа во областа Вал Верде, која гласаше за Трамп на изборите во 2020-та година. Некои жители на пограничниот град велат дека федералната влада ги напуштила кога станува збор за граничната безбедност.
И мигрантите и мексиканските власти велат дека во наредните денови може да се очекуваат многу повеќе мигранти.