Од денеска, 27 октомври, и утре, 28 октомври, „Визер“ започнува со пет нови авионски линии од Меѓународниот аеродром Скопје и од аеродромот Св. Апостол Павле – Охрид, соопштуваат од ТАВ Македонија.

Новите дестинации се Бари, Стокхолм, Мадрид, Ларнака и Базел. Утрово во 6:05 часот полета првиот авион на линијата Скопје – Стокхолм (Арланда), а подоцна денеска ќе следуваат летовите до Бари и Базел. Утре започнуваат летовите кон Мадрид и повторно воспоставената линија кон Ларнака.

Летовите од Скопје до Стокхолм и Бари, како и од Охрид до Базел, ќе се одвиваат двапати неделно – понеделник и петок, додека линијата до Мадрид ќе лета вторник, петок и сабота, а до Ларнака – вторник и сабота.

Од ТАВ Македонија очекуваат зголемен интерес на патниците, имајќи го предвид туристичкиот потенцијал на овие дестинации.

– Сигурен сум дека овие пет дестинации ќе бидат посетени и со нетрпение очекувани од патниците. Благодарен сум на целиот тим на ТАВ Аеродроми за поддршката во подготовката на овие линии. Посветени сме да обезбедиме уште повеќе дестинации од двата македонски аеродроми – изјави Неџат Курт, генерален директор на ТАВ Македонија.

Меѓу петте нови линии, Мадрид и Бари се целосно нови дестинации за македонскиот пазар, додека Ларнака и Базел се враќаат во понудата, а линијата до Стокхолм е нова поради тоа што авиокомпанијата отсега лета кон главниот аеродром Арланда.