Нова книга за Скопје: Антологиски раскази во кои градот станува личност
Збирката раскази „Скопски дамари“ од македонскиот писател Благоја Иванов, со поднаслов „автентичен книжевен вкус на старо и ново Скопје низ дваесетина антологиски раскази“, деновиве излезе од печат како 184. издание во едицијата „Проаза“ на издавачката куќа „Или-или“. Визуелниот дизајн на книгата е дело на Марија Смилевска, а излегувањето на книгата е поддржано од Град Скопје.
Изборот на расказите го направи Игор Анѓелков, кој во освртот кон збирката нагласува дека Иванов, заедно со Славко Јаневски, Влада Урошевиќ и Димитар Солев, е континуираниот хроничар на скопските случувања во неговите дела од пред Втората светска војна до денешен ден.
– Сето она што го раскажува Иванов во своите приказни за Скопје, како ретко кој македонски писател, создава своевидна мапа на градот, карта од која извира животна сила составена од нерви и крвни садови за силна пулсација на урбаното битие, која содржи и разни пукнатини и шуплини пред кои не смее да се затворат очите и кои треба да се забележат и да се прераскажат. Така, Скопје на суптилен начин станува засебен лик во оваа збирка раскази, град-личност кој секогаш е подготвен да ја покаже својата сила, „небаре сениште кое тешко ја поднесува дневната светлина“, но тој е и „брод со драгоцен товар“ на кој секогаш ќе му се навраќаме во нашите книжевни творби – забележува Анѓелков.
Благоја Иванов (1931) е македонски раскажувач, романописец, есеист, критичар и драмски автор. Дипломирал на Филолошкиот факултет во Скопје. Работел како главен уредник на Културниот сектор на Радио Скопје, директор на Телевизија Скопје и професор на ФДУ. Долги години го уредувал списанието „Млада литература“, а бил и главен и одговорен уредник на списанието „Разгледи“. Член е на ДПМ од 1958 година и негов претседател во два мандата. Член е на Македонскиот ПЕН-центар. Автор е на дваесетина прозни дела и добитник на повеќе награди.
(Текстот е објавен во „Културен печат“ број 33, во печатеното издание на „Слободен печат“ на 30-31 мај 2020)