Македонскиот репрезентативец Елмин Растодер продолжува со одличните настапи во швајцарското првенство, откако повторно се запиша во листата на стрелци во победата на Тун на гостувањето кај Сервет од 3-1, со што неговиот тим направи уште еден голем чекор кон шампионската титула.

Растодер беше човекот кој го отвори резултатот, постигнувајќи погодок во 40. минута за водство од 1-0, резултат со кој заврши и првиот дел од натпреварот.

Во продолжението, Тун ја потврди доминацијата со уште два гола, додека домаќините во судиското надополнување успеаја само да го ублажат поразот со почесен погодок.

За македонскиот репрезентативец ова беше осми гол сезонава во најсилната швајцарска лига, на што додаде и четири асистенции. Тун во моментов е убедливо прв на табелата, со дури 11 бода предност во однос на второпласираниот Лугано.