Европскиот парламент го потврди назначувањето на Андрес Ритер за нов европски главен обвинител, откако Советот на ЕУ вчера постигна договор за неговиот избор. Ритер ќе ја преземе функцијата на 1 ноември оваа година, пишува Канцеларијата на европскиот јавен обвинител.

Ритер ја започна својата кариера во 1995 година во обвинителството на Сојузна Република Германија, а во 2008 година стана заменик-главен државен обвинител во покраината Мекленбург.

Потоа тој раководеше со неколку јавни обвинителства, вклучувајќи го и Специјалното обвинителство во Росток од 2013 до 2020 година. Тој беше првиот европски обвинител назначен од Германија, а од 11 ноември 2020 година е заменик-главен европски обвинител.

„Топло го поздравувам назначувањето на Ритер за следен европски главен обвинител. Тој поседува сеопфатно разбирање за Европското јавно обвинителство и клучните предизвици со кои се соочува, како и длабока посветеност на независноста на судството“.

„Убедена сум дека под негово водство ЕЈО ќе продолжи да ги штити финансиските интереси на ЕУ и владеењето на правото на најефикасен начин“, рече Ковеши.

Лаура Кодруца Ковеши е Романка, доктор по право и една од најпознатите обвинителки во ЕУ. Таа беше најмлада и прва жена генерална обвинителка на Романија и стана „непријатно“ име за голем дел од романскиот политички естаблишмент.

Во 2019 година беше назначена за прв европски главен обвинител – на чело на новоформираното Европско јавно обвинителство (EPPO) со седиште во Луксембург, а нејзиниот мандат истекува во октомври оваа година.

Шестгодишниот мандат на Ковеши е препознатлив по неколку истраги од висок профил – вклучувајќи случаи поврзани со грчки министри, преговори за набавка на вакцини од ЕУ, Европската народна партија и наводна злоупотреба на средствата на ЕУ од страна на европратениците.

Европското јавно обвинителство е независно јавно обвинителство на ЕУ. Тоа е одговорно за истрага, гонење и изведување пред суд на сторителите на кривични дела што им штетат на финансиските интереси на Унијата.