Николов: Здравјето е најважно, ве охрабруваме да останете дома!
– Фудбалот е многу важен во нашите животи, но здравјето е најважната работа во светот – вели нашиот репрезентативец кој е член на Мол Види Фехервар.
И во Унгарија се прекинати фудбалските натпреварувања, а таму имаме вкупно тројца македонски репрезентативци Кире Ристевски (Ујпешт), Висар Муслиу (Фехервар) и Бобан Николов (Фехервар), а секако тука е и нашиот интернационалец Мирко Ивановски (Диосѓер ВТК).
После таа одлука на унгарската федерација, денеска на својот „Инстаграм“ профил се огласи и Николов со порака и до навивачите на неговиот клуб Мол Фехервар:
– Драги фанови на Мол Види Фехервар, како што веројатно знаете до сега, Унгарската фудбалска федерација ги суспендираше професионалните лиги, а нашиот клуб ги прекина и нашите тренинзи. Фудбалот е многу важен во нашите животи, но здравјето е најважната работа во светот. Ние, играчите, се трудиме да ја задржиме нашата форма дома и ве охрабруваме сите да останете дома или да ги минимизирате социјалните контакти ако можете. Ние веруваме дека можеме да се сретнеме повторно наскоро, и да славиме нови победи на Мол Види Фехервар, заедно – напиша Николов на „Инстаграм“.
Во вторник (17 март) од европската куќа на фудбалот се очекува да донесат одлука за плејоф мечевите, меѓу кои Македонија-Косово, како и за статусот на наредниот континентален собир.
И претходно Николов имаше своја објава на социјалните мрежи, поточно на Фејсбук каде што побара да се одложи мечот од УЕФА Лигата на нации за пласман на ЕП против косовската селекција.